اعترافات بويه سابقا

اعترافات بويه سابقه....

--------------------------------------------------------------------------------

ملاحضة هاي القصة حقيقة ومنقولة للعبرة والعظة


((بسم الله الرحمن الرحيم))
السلام عليكم ورحمة الله وبركاته...
اخواني واخواتي...اتمنى ان موضوعي ما يهمل واتمنى انكم تلقون لي الحلول المناسبه...
طبعا الشباب ما يعرفون شيصير فمدارس البنات...والله بلاوي...يعني عندنا سوالف الحب (بين بنت وبنت او بنت وبويه(بنت مسترجله) و ما خفي كان اعظم...
ما طول عليكم بالمقدمات...
انا البنت الوحيده بين 5 شباب وانا اصغرهم...والحمد لله ان امي وابوي على راسي...
ابوي كالعاده لاهي بالشغل... وامي بصديقاتها... و اخواني وطلعاتهم...
يعني بنت هاملينها...صحيح انهم ما يقصرون علي ... مصروف يكفيني وزياده الحمد لله...وبيت آمن...واطلع وارجع محد يقولي شي...وكل اللي يتمنونه البنات فعمري...بس مو انا...لاني كنت محتاجه اهتمامهم فيني اكثر من اي شي ثاني...
طفولتي كانت مع اخواني...لعبي معاهم وكل شي...تعودت اني اكون مثلهم في الكلام والتصرفات...وحتى الهيئه واللبس والشعر والمشيه...
كنت ياهل وماعرف ولا افهم اللي اسويه لين ما وصلت للمرحله الاعداديه وكان عمري 12 سنه ...عرفت ان هذا معناته ان انا بويه...وان هذا بعد شي حلو مب مثل ماكنت افكره...لاني كنت ألقى اهتمام البنات فيني وين ماروح...
كان شكلي ملفت ... من شعر ومشيه وكلام وحركات...وشخصيتي القويه...لدرجة ان محد كان يتجرأ و يدوس لي على طرف...وحتى لو وحده جربت كانت تندم لاني قويه بكل معنى الكلمه...يعني كان عادي عندي اكفخ البنت اللي تقط علي نغزه...وهي اكيد ما بتسكت لي لكن كان الكل واقف معاي ضدها...وخصوصا صديقاتي البويات اللي مايقصرون ابد...
واااااااااايد بنات قدموا لي عروض وكنت كل يوم مع وحده...
كان الكل وده يتعرف علي لدرجة انهم يجون من مدارس ثانيه بس عشان يشوفوني انا وصديقاتي البويات والله يعلم اني ما ابالغ في اللي اقوله... كنا احنا محور المدرسه..والبنات اللي عرفوني يتقربون اكثر واكثر عشان البويه رفيجتي وربع البويه رفيجتي نفس الشي...وكنا عايشين على هالمنوال...
وعلى الرغم من كل هاي كنت طيبه...بس في بنات انذال كنت العبها صح معاهم واوقفهم عند حدهم...ماكنوا يتجرأون يسوون لي شي لانهم يعرفون ان اكثر البنات بيوقفون معاي...
و موضوع علاقاتي ما اقتصر على بنات المدرسه وبس...لا والله حتى المدرسات – فئه قليليه منهم- ...كانوا شديدين مع الكل الا معاي انا...مع اني ما كنت مهمله وااايد.... كثر لعانتي و شطانتي بس كانت عند بعض المدرسات حركاتي مغفوره...وطريقة اسلوبهم معاي انا فاهمتها زين...بس ماكنت احب اخوض علاقه مع مدرسه مع البنات احسن بالنسبه لي...
المهم استمريت على هالحاله ومحد يدري عني اني مواصله هالانحراف (ان صح التعبير)...
وصلت للمرحله الثانويه...وانا كل يوم نفوذي يزيد وشهرتي اكثر واكثر...كنت احب اهتمام الكل في المدرسه فيني بس فنفس الوقت كنت اتمناه يكون في البيت هالاهتمام...
مره وانا قاعده في الصاله كنت اتكلم في التليفون – مع حبيبتي في ذيك الفتره- دخلت امي طالعتني وطالعتها ... ماهتميت وكملت مكالمتي مع ان الوقت كان متأخر حوالي نص الليل...
امي : يالله ما خلصتي مكالمتج
(ما تعودت انها تكلمني بهاللهجه الحازمه)
انا : يالله الحين اسكر...
و بالفعل سكرت الخط ورحت غرفتها لانها نادتني...
امي : شوفي يا يمه انا لا زم اتكلم معاج بصراحه...وانتي تعرفين ان انا مدرسه و الكلام يوصلني واذا استمريتي بهالطريق اللي انتي ماشيه فيه باعلم عليج ابوج واخوانج...باخليهم هم اللي يتصرفون معاج...
قمت بسرعه من عندها و انا معصبه...ولا فكرت حتى ادافع عن نفسي.. رحت غرفتي و فكرت فكلامها لين ما رقدت...
ومن اليوم الثاني صارت تراقب تصرفاتي و اذا شافتني اتكلم في التليفون سألتني اكلم من وكنت اقولها اني اكلم حبيبتي و لا همني اذا عصبت ولا لاء...و حتى اللبس صارت تدقق عليه...وهذا الشي ترك اخواني بعد يدققون على هالاشياء...بس مو مثلها... ووايد طوفولي حركات...بس مرات مثلا لو لبست كاب يقولي واحد من عسى ماشر صايره جنج واحد منا يالله بسرعه شليه من على راسج...
اخواني غفرت لهم تلاهيهم عني....لانهم هم بعد ماحصلوا الاهتمام والحب...وترى فاقد الشيء لايعطيه...صحيح ان احنا ما عندنا شك ولو واحد من المليون ان امنا وابونا يحبونا...لا والله احنا متأكدين من حبهم اللي للاسف فاقدينه...نبي نحس فيه...لان الحب مو بس كلام وعطايا...الحب اكثر من جذي بوااااايد...
وابوي بعد غفرت له...كان لاهي بشغله وسفراته...لكنه دايم يسأل عنا وعن احوالنا وحتى لو من بعيد لي بعيد...واذا كانت عنده فرصه والله انه يستخسر الساعه اللي بينام فيها على نفسه ويبي يقعد معانا...ودايما يحاول يعوضنا عن انشغاله في اللحظات القليله اللي يكون فيها في البلد او ماعنده فيها شغل...وكل اللي يسويه لنا...عشان نعيش احسن عيشه مثل ما احنا الحين ولله الحمد...
وطبعا ابوي يوم يكون موجود امي تخف طلعاتها ولا بعد تصير نادره....واخواني بعد يقعدون في البيت...
وانا بعد...
امي...حاولت اغفر لها بس ما قدرت...ماشوفها تستحق لانها المفروض يوم شافت تأخر ابوي وغيابه عن البيت كان لازم تكون لنا ام والابو وما تحسسنا بفقدان الابو....خلتنا بدال لا نخسر واحد نخسر اثنين...
وطبعا البيت اللي مافيه ام وابو اكيد بيكون خالي من الحب....واسرتنا مفككه ....
نرجع لموضوعنا....
هددتني امي اكثر من مره و ما سمعت الكلام ... سحبت مني الموبايل وصارت طلعاتي وزيارات صديقاتي لي ممنوعه...وهذا غير الملابس...ما سوت فيهم شي بس شرت لي واااايد تنانيير وفساتين وحتى دراريع...
مره كانت امي تطالع برنامج احبه فرحت وحطيت راسي على حضنها و تابعت معاها البرنامج...وطول الوقت كانت تلعب فشعري.. حسيت بحنانها اللي افتقدته فتره طويله..والله ان مادري شاللي خلاني عقب فتره ارفع راسي واشوف امي...وياليتني ما شفتها...
شفت الدموع فعينها...واول ما طالعتها شلت يدها من على شعري و مسحت دموعها.... وخفت ساعتها...
انا : يمه اشفيج؟؟؟ليش تصيحين؟؟؟
امي (وهي تصيح) : يا يمه لين متى بتمين على هالحاله...مافي شي اصعب من اني اشوفج ماشيه فهالطريج...
شلت راسي...وعدلت قعدتي...وحطيت عيني فعينها...
انا (وانا بعد اصيح) : الحين فكرتي فيني...بس يوم سمعتي ان انا جذي... ولا انتي طول عمرج ما كنتي بتعرفين ... ربيتيني مثل ما ربيتي اخواني...وحتى وانا صغيره كان لبسي نفسهم...ماكنتي تطلعيني معاج كنتي تخليني اقعد معاهم...لين ما تعودت خلاص اكون مثلهم في كل شي...والحين يايه في لحظه تبيني اتغير...يمه حطي هالكلام في بالج...لي فات الفوت...ما ينفع الصوت...
يتني امي تبي تلمني...وتخفف من احساسها بالذنب ...لكن ما خليتها...
ركضت غرفتي وانا اصيح...كنت محتاجه اني ألمها اكثر من ماهي محتاجه انها تلمني لكني كابرت وقفلت باب غرفتي...
تميت افكر جديا بأني ارجع بنت بكامل انوثتها ... مثل ما ربي خلقني...و ما قص عليكم كنت دايما افكر بيني وبين نفسي...لين متى بتم على هالحال؟؟...وكنت من صجي رافضه اللي انا فيه بس ما كان عندي حل...
تميت في غرفتي لين اليوم الثاني و في الوقت اللي كنت فيه فغرفتي كانت امي ماعطتني شريط ديني اسمه (العائدون من الموت) حسيت اني ابي اسمعه...وصج سمعته وفكرت في كل موقف سمعته في هالشريط وحطيت نفسي في مكان كل واحد منهم...وعقب ما خلص الشريط رحت توضيت وصليت لي ركعتين وقريت قرآن...
و سبحانك يا رب...قررت في ذيك اللحظات اني ارجع بنت... وليش ارجع وانا اساسا بنت...
كان شعري في ذيك الفتره مو وااايد قصير بس بعد مو طويل المهم فتحت كبتي وشفت تنوره قصيره ورديه لبستها ولبست معاها بلوزه بيضه و رفعت شعري وحطيت لي مكياج...شفت نفسي...والله كأني وحده ثانيه...من صج تغيرت...ولبست كعب ابيض يعني شكلي كان غير عن قبل بواااااايد.. وين ذاك القميص الوسيع اللي اخفي انوثتي به...ولا البنطلون اللي شاريته من محل رجالي ويطلع فضفاض علي...ولا الكاب والشعر اللي على العين...و نعال الرياييل بعد ...وكنت _وما زلت والله_ اكره اللون الوردي والحين لابسته... والله حتى انا استغربت من نفسي...
طلعت وشفت امي قاعده في الصاله...
افتحت عينها عالاخر لما شافتني بهالمنظر...قربت منها واحظنتني....وصحت....وهي بعد ما قدرت تحبس دموعها وصاحت معاي....
وفي هاللحظات ودعت نفسي وانا بويه واستقبلتها بنت ..وبكامل انوثتها بعد...
كانت هالفتره فترة اجازه
في الاجازه حاولت اني ابتعد عن صديقاتي وكل شي يربطني بالمدرسه بس عشان افاجأهم لما يشوفوني...
خلصت فترة الاجازه ورحت المدرسه وكنت مبالغه في المكياج بالنسبه حق المدرسه... واول ما دخلت المدرسه
شفت العيون كلها علي...والكل كان مستغرب هالتغير المفاجىء...وذاك اليوم مافي حد ما سألني عن هالتغير ... حتى المدرسات...وكنت اقولهم بغشمره حبينا نرجع نفس ما كنا...
وعالفرصه ربعي يازعم سووولي ((حفلة تحول)) ... شروا بيبسي و كوافي ووزعوهم عالبنات ... كنا ورى المدرسه و تقريبا اكثر من نص بنات المدرسه كانوا يايين يشوفوني عقب هالتغييرر...
يعني شعري اللي طول و مع القذله القصيره اللي يايه على عيني(يعني بنت)...و طريقة كلامي و مشيتي ولبسي والاهم من هاي كله اسلوبي الجديد ....بس بعد كنت اعاني من هالاسلوب اللي صعب اغيره...بس بذلت كل اللي اقدر عليه ...
كنت حديث المدرسه في ذيك الفتره ... توقعت اني لما بارجع بنت بتقل العروض بس صار العكس... كنت كل يوم لما ارجع من الفرصه الا ألقى رساله...او ورده...ووايد اشياء... بس كنت ما ابي في هالفتره ارجع لهالعلاقات...خلاص قررت التوبه...لاني ضج حسيت بالندم على كل اللي سويته...
واستغربت ان حتى صديقاتي البويات قدموا لي عروض...وهم صديقاتي...
و كثر ما قاومت حسيت اني انهزمت مع اني كنت كارهه اللي يصير...حتى الاهتمام صرت ماحبه الا ماطيقه و كنت اتمنى اني اكون مجرد بنت عاديه مثل باقي البنات بس هم كانوا يعاملوني غير...حتى لما كنت اتغشمر مع اي وحده مو شرط رفيجتي وامسك ايدها يقعدون ربعها يصرخون ويقولون من قدج...وهالشي اللي كان يحسسني اني مهما سويت بيتمون يشوفوني غير...
ما قص عليكم قبل كنت امووت على هالاشياء...مع اني ماكنت ابين... بس في هالفتره كرهت هالطريقه...
كان الكل يسألني عن العروض وباختار من....وفكرت وفكرت واحترت...بس مادري شاللي خلاني فيوم اقرر واختار...
يعني خربت كل اللي سويته....بس هالمره وانا بنت مو بويه...
وكانت مكالماتي مع حبيبتي لين الصبح وكل ما تشوفني امي وتهاوشني اقولها كنتي تبيني ارجع ورجعت اشتبين اكثر...وخلاص ايأست مني وخلتني على راحتي...مثل مابي...
وهذي بختصار قصتي....ابي ابتعد عن هالطريق بس مب قادره لاني تعودت عليه...وامي اللي ماقاومت اكثر...تركتني اضيع وانا بنتها الوحيده...ابي حد ينصحني...حد يدلني على الطريق الصح...انا بس ابي كلام قوي يأثر فيني عشان ارجع بس للاسف ما لقيت هالكلام...
هذي قصيده شفتها في الجريده لشاعره اسمها عاشقة الشعر...
((قضية شذوذ العاطفه من واقع معايش غصه بغصه ...))
عنوانها ((بين البنات....!!))
دقيقه .. خلكم عن فاضي الهرج وسخيف القيــــــــل
تعالوا عندنا .. وضع .. غريب .. لازم نحلــــــــــــــه
(( شذوذ العاطفه )) بين البنات اصبح قضية جيـــل
واذا ما استدرك الوضع بيضيع المجتمع كلــــــه !!
وش اللي بدل اوضاع المشاعر عندنا تبديــــــــل ؟!
وش اللي شوهك يا فطرة الحب السوي .. باللــه ؟!
علاقات .. و تفاهات .. وعجايب من هنا .. لليــــــــل
امور مطينه زادت مع اهمال الوضع بلــــــــــــــــــه
ترى ما عاده لعاب الذياب وحده يسيــــــــــــــــــــــل
غدا بين البنات اكبر عدو .. وهذي العلــــــــــــــه ..
(( حيايا )) ناعمة ملمس .. تميل ضعفهن وتميـــــل
تفوق بمكرها مكر الذياب اليا امسكت ذلــــــــــــــــه
ثقافتهن ثقافة غرب متعفن و فكر دخيـــــــــــــــــــل
طبايعهن بلا دين .. وضمايرهن بلا ملــــــــــــــــــــه
بدايتهن لعب – ضحك – وسعة صدر وغرام طويـل
ضياع يبتدي ببنت تجرجر بعدهاااا..شلــــــــــــه !!
انا اوافق الشاعره في اغلب اللي قالته الا...
ثقافتهن ثقافة غرب متعفن و فكر دخيـــــــــــــــــــل
طبايعهن بلا دين .. وضمايرهن بلا ملــــــــــــــــــــه
يمكن في بنات ياخذون هالمسأله لعب بس والله انكم لو تسمعون قصص هالبويات بتكتشفون شي مختلف عن اللي تشوفونه...
انا ماحاول ادافع عنهم ولا عن نفسي ... بس هذي الحقيقه...ظروفنا حدتنا...وترى مافي بنت مستقويه الا وراها بلاوي...يمكن كم بنت بس بويات عشان يلاقون الاهتمام وبعد ينعدون على الاصابع...ومع الوقت يملون ويرجعون مثل ما كانوا...لان الواحد مايقدر يمثل ويتصنع على طول...
لكن اللي مثلي وراهم اكيد ظروف حدتهم...والمفروض انكم ما تعاملونا على ان احنا فئه منحرفه وشاذه و...و...
احنا نبي حل...
والله العظيم ان وحده من البويات كانت تقولي انها وهي صغيره عمرها تقريبا 9 سنوات...اغتصبها واحد من اهلها... وهي ما سكتت عن الموضوع...على العكس قالت حق اهلها عشان يتخذون موقف من اللي صارلها...لكن صار العكس...بما انه واحد من العيله اهلها اسكتوا عن الموضوع...وهددوها بأنها ماتعلم حد...وصارت تحس ان هي المسؤوله عن اللي صار لها... تحس ان هي اللي اغلطت... وهي مالها خص...والمفروض حتى ماتحس ولو احساس قليل بالذنب اللي محمله نفسها اياه...
وبما انها كبرت وفهمت... حست ان الشباب بس هم اللي يسوون اللي يبونه ومحد يقدر يقولهم لاء وعشان جذي حبت تكون مثلهم...وتحاول تتهرب من الواقع اللي انفرض عليها انها تعيشه...
و اكثر واكثر بعد من السوالف والبلاوي....بس حبيت اذكر لكم هالقصه وابي اعرف رايكم في اللي صار لها...
ومب مثل ما قالت الشاعره ان احنا بلادين وبلا ضماير...
يعني اللي مثل حالتي كانت يمكن تضيع بطرق ثانيه واخطر من هالضياع...يعني اكيد كل ضياع خطير بس في اطرق اخطر بوااااايد من هالضياع....وتأكدوا ان كل شي مسموح لي دام انه مافي رقابه علي لامن ام وابو ولا حتى من اخوان...ولا اقل شي اللي هم الاهل والقرايب...
بالعكس...يمكن ابين قويه بس والله من داخلي اي موقف بسيط يهزني...ولكني اظطر اني ما اظهر مشاعري الا لما اكون بروحي ... وهذا الشي يضايقني وااايد...لان حتى مشاعري محبوسه...تعبت من كبت المشاعر...ابي حد افضفض له...
اكتب لكم قصتي وانا اصيح من كل قلبي...اصيح على نفسي وحالتي...وقصتي اللي عمري ماقلتها حق احد غيركم... وحتى يمكن تهتمون اكثر من اهلي وهم اهلي...
يا ترى انا الغلطانه...ولا الظروف اللي حدتني....امي السبب...ولا ابوي...او اخواني...
انا مظلومه او ظالمه....انا شنو؟؟؟...من انا؟؟....
انتوا معاي...ولا ضدي؟؟؟
تعبت والله تعبت...تعبت من نفسي وحالتي...تعبت من كثر ماكتم بس للاسف ما القى حد اقوله...غيركم...لاني اعرف انكم الوحيدين اللي بقيتولي عقب ما اهلي خلوني وراحوا...وصديقاتي اللي .... ولا بلاش احسن...

شرايكم بقصتها يا شباب وبنات المنتدى ...ابي رايكم بكل صراحة وموضوعية ..
هالقصة واااقعية ومنقووولة للعبرة والعضة
انتظر ردودكم

تحياتي
بنـ العمه ـت

الله بهديهم انشاء الله ويعطيج العافيه اختي

تسلم مستر ع الرد